జీవి దర్శకత్వంలో బాలకృష్ణ...

• కథ, కథ వినిపించిన వ్యక్తి కేరక్టర్, కథలో తన కేరక్టర్... ఈ మూడూ నచ్చితే చాలు. పాత, కొత్త - చిన్న, పెద్ద అనే తారతమ్యాలు చూడరు బాలకృష్ణ. కళ్లుమూసుకొని అవకాశం ఇచ్చేస్తారు.  అలా చాలామంది చిన్న దర్శకులకు అవకాశం ఇచ్చారాయన. ఇప్పుడు ఆ దర్శకుల వరుసలో నటుడు, దర్శకుడు సుధాకర్‌నాయుడు(జీవి) కూడా చేరబోతున్నారు. బాలకృష్ణను డెరైక్ట్ చేసే సువర్ణావకాశాన్ని సొంతం చేసుకున్నారని తెలిసింది.  గతంలో చాలా చిత్రాల్లో నెగెటివ్ పాత్రల్లో కనిపించిన జీవి... ఆ తర్వాత హీరో, రంగ ది దొంగ చిత్రాలకు దర్శకత్వం వహించారు. ఆయన బాలకృష్ణ కోసం ఓ శక్తివంతమైన కథను తయారు చేశారని, ఆ కథ బాలకృష్ణకు బాగా నచ్చి, గ్రీన్ సిగ్నల్ ఇచ్చారని విశ్వసనీయ సమాచారం. ఓ అగ్ర నిర్మాత ఈ చిత్రాన్ని నిర్మించబోతున్నారని తెలిసింది.  ఇదిలావుంటే... బాలకృష్ణ నటించిన ‘శ్రీరామరాజ్యం’ నవంబర్ 17న విడుదల కానుంది. ఆయన నటిస్తున్న కీర్తి కంబైన్స్ చిత్రం, మంచు లక్ష్మీప్రసన్న నిర్మిస్తున్న ‘ఊకొడతారా ఉలిక్కి పడతారా’ నిర్మాణ దశలో ఉన్నాయి.  ఇంకా బి.గోపాల్ దర్శకత్వంలో బెల్లంకొండ సురేష్ నిర్మించే చిత్రంతో పాటు, జయంత్ దర్శకత్వంలో కూడా ఆయన ఓ చిత్రంలో నటించనున్నారని సమాచారం.  ఇలా యమస్పీడుగా సినిమాలు చేస్తూ 100వ సినిమాకు చేరువ అవుతున్నారు బాలకృష్ణ.